केंद्रीय पथकाचा पाहणी दौऱ्यात शेतकऱ्यांशी आस्थेवाईक संवाद

नांदेड, दि. 21 - जिल्ह्यातील पर्जन्यमान, टॅंकरने पाणी पुरवठा सुरु असलेली गावे तसेच पीक परिस्थिती याबाबत केंद्रीय पाहणी पथकाने आज जिल्ह्यातील कंधार, लोहा तालुक्यातील गावांत पाहणी केली, तसेच शेतकरी, नागरिकांशी आस्थेवाईक संवादही साधला. या पथकाने आज शनिवारी सकाळी नांदेड जिल्ह्यातील पाहणीसाठी दौरा केला.

या पथकात नवी दिल्लीतील  जलसंशोधन संस्थेचे वरीष्ठ सहायक आयुक्त सतिश कामभोज, भारतीय अन्न महामंडळाच्या (एफसीआय) मुंबई क्षेत्रीय कार्यालयातील उपमहाव्यवस्थापक एम. एम. बोऱ्हाडे तसेच औरंगाबाद विभागीय आयुक्त कार्यालयाचे उपायुक्त (सा.प्र.) विजयकुमार फड यांचा समावेश होता. या पथकासमेवत जिल्हाधिकारी सुरेश काकाणी, जिल्हा परिषदेचे मुख्य कार्यकारी अधिकारी अभिमन्यु काळे, जिल्हा अधीक्षक कृषी अधिकारी डॅा. टी. एस. मोटे, उपविभागीय अधिकारी जयराज कारभारी, अश्विनी पाटील यांच्यासह कृषी, जलसंपदा, पशूसंवर्धन, भूजल सर्वेक्षण आदी विभागांच्या अधिकारी यांचीही उपस्थिती होती.

पाहणी दौऱ्यादरम्यान आमदार प्रताप पाटील-चिखलीकर यांनी कंधार येथे जगतूंग तलाव, तसेच मन्याड नदी बंधारास्थळी पथकातील सदस्यांशी संवाद साधला. प्राचीन जगतूंग तलावाची भौगोलीक रचना, परिसरातील पर्जन्यमान आणि पाणीस्थिती याबाबतची माहिती पथकातील सदस्यांनी घेतली. बहादुरपूरा येथील नागरिकांशीही सदस्यांनी संवाद साधला, यावेळी सरपंच माधव पेटकर यांनी गावासाठी उपलब्ध जलस्त्रोत, पाणीसाठा याबाबत माहिती दिली. वाटेत फुलवळ येथील नागरिकांचे म्हणणेही पथकाने ऐकून घेतले.  तेथून पुढे डिग्रज येथील शिवारात पथकाने भेट दिली. डिग्रज बुद्रूक येथील आप्पाराव शिंदे यांच्या शिवारातील हळद पीकाची माहिती पथकाने घेतली. विश्वंभर जयंतराव पाटील यांच्या फळबाग, कपाशीची पथकाने माहिती घेतली. कुरुळा-माळाकोळीच्या वाटेवर उमरगा-खोजण गावातील तिरुपती केंद्रे, मारूती केंद्रे यांच्या शिवारातही पथकाताली सदस्यांनी आणि अधिकाऱ्यांनी संवाद साधला. माळाकोळी येथे वैजनाथ तिडके यांच्या शेतातील हळद, तूर पीकांचीही माहिती पथकाने घेतली. यावेळी उपस्थित शेतकऱ्यांशी संवाद साधताना पथकातील सदस्यांनी पेरा, उपलब्ध पाणीसाठा, पिकांची स्थिती, उत्पन्न आदींबाबत तपशीलवार चर्चा केली.

दरम्यान, केंद्रीय पथकाचे शुक्रवार 20 नोव्हेंबर,2015 रोजी सायंकाळी आगमन झाले होते, यादिवशी जिल्हाधिकारी श्री. काकाणी, मुख्य कार्यकारी अधिकारी श्री. काळे यांनी जिल्ह्यातील स्थितीबाबत सादरीकरणाद्वारे पर्जन्यमान, पीक परिस्थिती, पाणी पुरवठा याबाबत माहिती दिली. पाहणी दौऱ्यात सहभागी विविध विभागांच्या अधिकाऱ्यांनीही पथकातील सदस्यांना पीक, पाणी आणि उत्पन्नाबाबतची प्रत्यक्ष माहिती दिली. नागरिकांनीही पथकातील सदस्यांशी मोकळेपणाने संवाद साधला.

000000000

अपंग कर्मचाऱ्यांचा रविवारी मेळावा

नांदेड दि. 20- अपंग कर्मचाऱ्यांचा जिल्हा मेळावा रविवार 22 नोव्हेंबर रोजी सकाळी 11 वा. जिल्हा परिषदेच्या प्रांगणात आयोजित करण्यात आला आहे. जिल्ह्यातील अपंग कर्मचाऱ्यांनी मेळाव्यास उपस्थित रहावे, असे आवाहन जिल्हा अध्यक्ष सुधाकर शेवाळे यांनी केले आहे. मेळाव्यास राज्य सचिव परमेश्वर बाबर, कोषाध्यक्ष रविंद्र पाटील, प्रहार अपंग संघटनेचे विठ्ठल मंगनाळे हे मार्गदर्शन करणार आहेत.

0000000

केंद्रीय पथक दाखल

औरंगाबाद,‍ दि. 19 : औरंगाबाद आणि नाशिक महसूल विभागातील टंचाईसदृश्य परिस्थितीची पाहणी करण्यासाठी केंद्र सरकारच्या पथकाचे आज सायंकाळी येथे आगमन झाले.

केंद्रीय कृषी मंत्रालयातील आयुक्त डॉ. एस. के. मल्होत्रा यांच्या नेतृत्वाखालील या पथकाने येथील विभागीय आयुक्त कार्यालयात झालेल्या एका बैठकीत परिस्थितीची माहिती घेतली.  सुमारे दोन तास चाललेल्या या बैठकीत राज्य शासनाचे मदत व पुनर्वसन विभागाचे सचिव डॉ. के. एच. गोविंदराज, औरंगाबाद विभागाचे महसूल आयुक्त डॉ. उमाकांत दांगट, नाशिक विभागाचे विभागीय आयुक्त एकनाथ डवले यांनी राज्य तसेच संबंधित विभागातील खरीप तसेच रब्बी हंगाम, चालू वर्षातील आजवरचा पाऊस, अपुऱ्या पावसामुळे निर्माण झालेली परिस्थिती, पाणीसाठा, भुगर्भातील पाणीपातळी या बाबींची तसेच पाणीपुरवठ्यासाठीच्या उपाययोजना आणि मराठवाडा विभागातील तीन जिल्हयात सध्या सुरु असलेल्या गुरांच्या छावण्यांची माहिती दिली. 

डॉ. मल्होत्रा यांच्या नेतृत्वाखालील केंद्रीय पथकात कापूस विकास संचनालयातील संचालक डॉ. आर. पी. सिंग, केंद्रीय उर्जा मंत्रालयातील वीज प्राधिकरणाचे उपसंचालक शंतनु विश्वास, निती आयोगातील उपसल्लागार मानस चौधरी, केंद्रीय अन्न धान्य महामंडळातील वरिष्ठ अधिकारी एम. एम. बोऱ्हाडे, केंद्रीय जलसंसाधन मंत्रालयातील वरिष्ठ सहआयुक्त सतीश कामभोज, केंद्रीय पशुसंर्वधन विभागातील सहाय्यक आयुक्त डॉ. एच. आर. खन्ना, केंद्रीय पाणीपुरवठा आणि स्वच्छता मंत्रालयातील अवर सचिव के. नारायण रेड्डी, केंद्रीय ग्रामीण विकास मंत्रालयातील सहाय्यक आयुक्त जगदीश कुमार आणि केंद्रीय वित्त मंत्रालयातील उपसंचालक ए. के. दिवाण यांचा समावेश आहे.

या पथकातील विविध सदस्य शुक्रवार,दि. 20 आणि शनिवार,दि.21 नोव्हेंबर रोजी मराठवाडा विभागातील आठ जिल्हयांचा तसेच नाशिक विभागातील बुलढाणा, जळगांव, धुळे, नाशिक आणि अहमदनगर जिल्हयांचा दौरा करणार असून परिस्थितीची पाहणी करणार आहेत.  दौऱ्यासाठी पथकाच्या चार तुकड्या करण्यात आल्या आहेत.

आज रात्री झालेल्या बैठकीला औरंगाबादच्या जिल्हाधिकारी डॉ. निधी पाण्डेय, मुख्य कार्यकारी अधिकारी अभिजित चौधरी, राज्य आपत्ती व्यवस्थापन प्राधिकरणाचे संचालक सुहास दिवसे, महसूल उपायुक्त जितेंद्र पापळकर, उपजिल्हाधिकारी शिवाजी शिंदे, बुलढाण्याचे अतिरिक्त जिल्हाधिकारी शिवानंद टाकसाळे यांच्यासह कृषी, पशुसंर्वधन, भुजलसर्वेक्षण आदि विभागांचे वरिष्ठ अधिकारी उपस्थित होते.

दीपावली उत्सवाचा प्रकाश सर्वांच्या जीवनात आनंद, समाधान व सुख-समृध्दी घेऊन येवो. सर्वांना दीपावली उत्सवाच्या मन:पूर्वक हार्दिक शुभेच्छा...!

कार्यक्षम.. लोकाभिमूख.. पारदर्शक.. सरसम ग्रामपंचायतसाठी निवडणुकीतील विजयाचा आनंदोत्सव साजरा करताना नागरीक मंगळवार 3 नोव्हेंबर 2015